پاکستان کے زیرِ انتظام آزاد جموں و کشمیر (PAJK) اس وقت ایک خطرناک سیاسی تعطل کا شکار ہے، جس میں تین بنیادی فریق شامل ہیں:حکومتِ پاکستان، حکومتِ آزاد جموں و کشمیر اور جوائنٹ عوامی ایکشن کمیٹی (JAAC)۔ سیاسی کمزوری یا ناکامی کے تاثر سے بچنے کے لیے فی الوقت کوئی بھی فریق پیچھے ہٹنے کو تیار نہیں۔ تاہم، یہ تعطل جتنا لمبا ہوگا، سماجی دراڑیں اتنی ہی گہری ہوں گی اور عوامی مسائل کا حل مزید دور ہوتا جائے گا۔
اس جمود کو توڑنے کے لیے محض عارضی یا سطحی اقدامات کافی نہیں ہوں گے۔ اس کے لیے حقیقی سیاسی تدبر، ایک دوسرے کے وجود کو تسلیم کرنے کا جذبہ، ادارہ جاتی جواب دہی اور ایک ایسا قابلِ اعتماد مذاکراتی فریم ورک درکار ہے جو تمام فریقین کو اپنی قانونی ذمہ داریوں اور بنیادی موقف سے دستبردار ہوئے بغیر بات چیت کا موقع فراہم کرے۔
بنیادی سیاسی الجھن (The Catch-22)
مذاکرات کے آغاز سے قبل عوامی ایکشن کمیٹی سے دھرنا ختم کرنے کا مطالبہ کرنا اس سیاسی تعطل کا حل ثابت نہیں ہو سکتا۔ ایکشن کمیٹی مذاکرات کی آمادگی ظاہر کر چکی ہے، لیکن ریاست کی جانب سے ایک باقاعدہ اور قابلِ اعتماد طریقہ کار کے ذریعے براہِ راست گفتگو میں ہچکچاہٹ نظر آئی ہے۔
کشیدگی اور تصادم کے دوران اطلاعات کے مطابق تقریباً 100 قیمتی انسانی جانیں ضائع ہو چکی ہیں۔ ایسے حالات میں ایکشن کمیٹی کی قیادت کے سامنے ایک بڑا چیلنج ہے: اپنے حامیوں کو یہ دکھائے بغیر کہ باہم معنی مذاکرات اور عملی پیش رفت شروع ہو چکی ہے، تحریک کو ختم کرنا سیاسی اور عملی طور پر ممکن نہیں لگتا۔
اس تصادم میں ہونے والے انسانی نقصان کا مکمل اعتراف بھی ضروری ہے۔ مظاہرین کی جانیں بھی گئی ہیں اور قانون نافذ کرنے والے اداروں کے اہلکار بھی شہید و زخمی ہوئے ہیں۔ دونوں جانب کے نقصان کو تسلیم کرنے کا مقصد نہ تو عوام کی شکایات کو کم تر دکھانا ہے اور نہ ہی کسی فریق کو ذمہ داری سے بری کرنا؛ بلکہ اس کا مقصد مزید جانی نقصان کو روکنا اور ایک آزادانہ عمل کے ذریعے حقائق کو سامنے لانا ہے۔
دوسری جانب، حکومتوں سے بھی یہ توقع نہیں رکھی جا سکتی کہ وہ ایکشن کمیٹی کی طرف سے کسی باہمی لوٹ پھیر یا ضمانت کے بغیر یکطرفہ طور پر تمام مطالبات تسلیم کر لیں۔ دھرنا ختم کرنے کو مذاکرات کی شرط بنانا ایک اور رکاوٹ کھڑی کر سکتا ہے۔ بہتر راستہ یہ ہے کہ دھرنے کے خاتمے اور کمیٹی پر عائد ممنوعہ حیثیت جیسے مسائل کو ایک وسیع تر مذاکراتی عمل کے اندر اعتماد سازی کے اقدامات (Confidence-Building Measures) کے طور پر حل کیا جائے۔
اصل الجھن یہی ہے کہ ہر فریق دوسرے کے پہلے قدم اٹھانے کا منتظر ہے۔ اس کا حل ایسے بیک وقت اور باہمی اقدامات میں ہے جو دونوں اطراف کو وقار کے ساتھ کشیدگی کم کرنے کا موقع دیں۔
ریاستی اختیار بمقابلہ طاقت کا استعمال: عمل داری کا مفہوم
ہر حکومت کا آئینی فرض ہے کہ وہ امن و امان قائم رکھے اور اپنے شہریوں کا تحفظ کرے۔ جمہوری حقوق کا مطالبہ ریاست کو ان بنیادی ذمہ داریوں سے دستبردار نہیں کر سکتا۔ تاہم، قانون کی حکمرانی (Rule of Law) کے ذریعے امن قائم کرنا اور محض طاقت (Sheer Force) کے ذریعے نظم و نسق نافذ کرنا دو مختلف باتیں ہیں۔
- قانون کی حکمرانی: یہ شہری حقوق کا تحفظ کرتے ہوئے امن و امان قائم کرتی ہے۔ حکومت کی اخلاقی اور قانونی حیثیت انصاف، شفافیت اور عوامی اعتماد سے حاصل ہوتی ہے۔
- طاقت کا استعمال: اس میں امن قائم کرنے کے لیے جبر اور دباؤ پر انحصار کیا جاتا ہے، جبکہ ادارہ جاتی حیثیت اور عوامی قبولیت کو ثانوی سمجھا جاتا ہے۔
ریاست محض اختلافِ رائے کو دبانے سے مضبوط نہیں ہوتی۔ حقیقی اقتدار اور احترام اس وقت بڑھتا ہے جب شہریوں کو یہ یقین ہو کہ قوانین کا اطلاق منصفانہ ہے، ادارے جواب دہ ہیں اور اپنے مطالبات پُرامن طور پر پیش کرنے کی آزادی حاصل ہے۔ ایک بالغ نظر جمہوریت پُرامن اختلاف کو سیاست کا فطری حصہ سمجھتی ہے، ریاست سے غداری نہیں۔ اس کے برعکس، مظاہرین کی بھی ذمہ داری ہے کہ وہ قانون کا احترام کریں، املاک کو نقصان نہ پہنچائیں اور اپنے حقوق کےلیے پُرامن طریقے اختیار کریں۔
ایک بالغ نظر جمہوریت پُرامن اختلاف کو سیاست کا فطری حصہ سمجھتی ہے، ریاست سے غداری نہیں۔
آزاد جموں و کشمیر میں "ریاست کی عمل داری" کی بحالی کا مطلب محض طاقت کے زور پر کنٹرول حاصل کرنا نہیں ہونا چاہیے، بلکہ اداروں پر عوامی اعتماد کی بحالی، شہری آزادیوں کا تحفظ، قانونی جواب دہی اور عوامی شکایات کا ازالہ ہونا چاہیے۔
سیاسی تعطل ختم کرنے کے لیے تین باہمی اقدامات
کسی ایک فریق سے سرفرنڈر کرنے کی توقع رکھنے کے بجائے، دونوں اطراف کو ایک ساتھ ایسے اقدامات کرنے چاہئیں جن سے اعتماد بحال
ہو سکے:
حکومتوں (پاکستان اور آزاد جموں و کشمیر) کے لیے اقدامات:
- قابلِ اعتماد مذاکراتی فریم ورک کا قیام: ایک بااختیار اور نمائندہ مذاکراتی کمیٹی کا باضابطہ اعلان کیا جائے جس کا مینڈیٹ، مدت اور اختیارات واضح ہوں۔ آزاد کشمیر حکومت اس سیاسی عمل کی قیادت کرے، جبکہ مرکزی نوعیت کے امور پر اسلام آباد کی حمایت حاصل ہو۔
- قانونی کارروائیوں میں عارضی وقفہ: احتجاج کے سلسلے میں کی جانے والی نئی قانونی کارروائیوں اور گرفتاریوں پر ایک مقررہ مدت کے لیے عارضی وقفہ دیا جائے۔ اس سے گفتگو کے لیے سازگار ماحول بنے گا، بغیر کسی کو غیر مشروط استثنیٰ دیے ہوئے۔
- آزاد اور غیر جانب دار تحقیقاتی کمیشن: 5 جون سے آزاد کشمیر میں پیش آنے والے واقعات کی تحقیقات کے لیے ایک غير جانب دار کمیشن قائم کیا جائے جو ہلاکتوں، زخمیوں، طاقت کے استعمال، گرفتاریوں اور تمام فریقین کے کردار کا جائزہ لے تا کہ حقائق سامنے آئیں، ذمہ داری کا تعین ہو اور متاثرین کے لیے مناسب معاوضے کی سفارش کی جا سکے۔
جوائنٹ عوامی ایکشن کمیٹی (JAAC) کے لیے اقدامات:
- بااختیار مذاکراتی ٹیم کی تشکیل: ایک باضابطہ ٹیم تشکیل دی جائے جو مطالبات کو ترجیحات میں تقسیم کرے، عارضی اعتماد سازی کے اقدامات کو طویل مدتی اصلاحات سے الگ کرے اور تعمیری مذاکرات کا حصہ بنے۔
- پُرامن طریقے سے کشیدگی کم کرنے کا عزم: عدم تشدد کے اصولوں پر کاربند رہنے کا اعادہ کیا جائے اور اس بات پر اتفاق کیا جائے کہ باضابطہ مذاکرات شروع ہونے اور ابتدائی اعتماد سازی کے اقدامات کے بعد دھرنے کو مرحلہ وار ختم کر دیا جائے گا۔
- متفقہ لائحہ عمل پر عمل درآمد میں تعاون: حکومت، معاشی انصاف، وسائل کی منصفانہ تقسیم، شہری آزادیوں اور سیاسی نمائندگی جیسے اہم امور پر واضح روڈ میپ تیار کرنے اور اس کی نگرانی کے لیے مشترکہ ورکنگ گروپس میں فعال کردار ادا کیا جائے۔
اصل اصول سادہ ہے: کسی بھی فریق کو پہلا قدم اٹھانے سے پہلے مکمل اعتماد کا تقاضا نہیں کرنا چاہیے۔ ہر فریق کو ایسا قدم اٹھانا چاہیے جو دوسرے کے لیے اگلا قدم اٹھانا آسان بنا دے۔
یہ کسی فریق کی پسپائی نہیں، بلکہ موجودہ الجھن (Catch-22) سے باہر نکلنے کا ایک مشترکہ راستہ ہے۔
مہاجرینِ جموں و کشمیر کی نشستیں: وسیع تر بحران کا ایک پہلو
آزاد کشمیر قانون ساز اسمبلی میں مہاجرین کی 12 نشستیں ایک اہم آئینی معاملہ ہیں، لیکن یہ موجودہ احتجاجی تحریک کی واحد وجہ نہیں ہیں۔ موجودہ بحران کی جڑیں کئی ساختی مسائل میں ہیں: معاشی مشکلات، حکومتی اصلاحات، وسائل کی منصفانہ تقسیم، شہری حقوق، اور آزاد کشمیر اور اسلام آباد کے درمیان تعلقات کی نوعیت۔
اگرچہ مہاجرین کی نشستوں کے معاملے پر سنجیدہ اور تخلیقی گفتگو کی ضرورت ہے، لیکن اسے ایک جامع سیاسی حل کے حصے کے طور پر دیکھا جانا چاہیے، نہ کہ دیگر تمام عوامی مطالبات پر حاوی مسئلہ بنا کر پیش کیا جائے۔
4 اکتوبر 2025 کا مظفرآباد معاہدہ اس سلسلے میں ایک اہم بنیاد فراہم کرتا ہے۔ اس کے تنازعات کے حل کے میکانزم کو دوبارہ فعال کرنا مذاکرات اور وسیع تر اصلاحات کے لیے ایک عملی نقطہ آغاز بن سکتاہے۔
نتیجہ: آگے کا راستہ
حقیقی سیاسی قیادت طویل تعطل کو برقرار رکھنے یا دوسرے فریق کو جھکنے پر مجبور کرنے میں نہیں، بلکہ اپنے وقار کو برقرار رکھتے ہوئے دیرپا امن کی طرف بڑھنے میں ہے۔
آزاد جموں و کشمیر کو ایسی سیاست کی ضرورت نہیں جہاں ایک کی جیت دوسرے کی ہار ہو۔ اسے ایک ایسے حل کی ضرورت ہے جو عوامی اعتماد بحال کرے، آئینی حقوق کا تحفظ کرے، ریاستی اداروں کی قانونی حیثیت کو مضبوط بنائے اور ان بنیادی مسائل کو حل کرے جن کی وجہ سے لوگ سڑکوں پر آئے تھے۔
قیادت کا اصل امتحان یہ ہے کہ آیا آزاد جموں و کشمیر میں ایسا حل ممکن بنایا جا سکتا ہے جس میں کسی کو شکست یا نا کامی کا سامنا نہ کرنا پڑے۔
تبصرے (0)